كانوا صغار .. بقلم .. مريم عكاري

كانو ظغار بعمر الورود وانا كمان ما كتير كنت كبيرة فتحت عيوني فجأة لقيت حالي معلمة يعني ام  وعندي كام صبية  كانو يسموهونً بالمدرسة بنات مريم  وفعلاً كنت حس حالي أمون كانو لازقين فيني وانا كنت حب طالباتي كلون و فعلاً متل بناتي موت عليون ولهلق بحبون كتير  يمكن هنه ينسوني بس انا متل الام يلي سافرت بعيد وحملت ولادا بألبا و لا يمكن تنساهون  حافظة قصص عنون هنه يمكن ما بيذكروها بدور على صفحاتون بشوف صورون وصور ولادون ، ومن فترة قصيرة كنت عم دور بصفحة وحدة منون حبيت شوف كيف صاروا ولادا لاني شتقتلون وبدي شوف قديش كبروا ولأني عم حاول ولأكتر من مرة دور على صبية منون بعرف انو هي واياها كتير قراب من بعض وصحاب  شوف شو اخبارا كان  بدي بس صورة بس خبر ، وغصت وشفت صورة إلها  ابتسمت وقلت اخيراً لقيتك وحاولت دور اكتر بلكي عامليلا تاك بالصورة وبفتح على صفحتها 😢😢😢بس يلي قريتو وكان تحت الصورة كان الله يرحمك يا خالتو نانا 😥 يا ربي دخيلك سألت حالي صحي نانا ... ؟

يا ريتني ما دورت يا ريتني ما قريت يا ريتني ما شفت صورتك يا حبيبة البي يا بنتي رانيا علوش  الله يرحمك رحتي بكير كتير كنت عم احلم بس انزل على سوريا أعملك مفاجأة وإجي عالبلدية اشرب معك فنجان القهوة يلي عودتيني علية وشوف نظرتك يلي فيها أدب واحترام ومحبة وحنيّة الدنيا كلها اخر مرة قلتيلي قعدي اسى شوي بس شوي 😪 ووعدتك ارجع وهلق اذا رجعت ما عاد رح شوفك يا ريتني قعدت اسى شوي 😪

وداعاً رانيا ام احلى جدولتين بالعالم 

ويا ريتني ما دورت عليكي حرقتيلي البي 😪

الصورة نحن و المرحومه رانيا بعرس او خطبة اخوها.. الله يرحما

مريم عكاري